तात्या–आभई आदर्श प्रतिष्ठानतर्फे उद्या शनिवारी सहा मान्यवरांचा गौरव* —————————————– *वेगवेगळ्या क्षेत्रातील मान्यवरांना पुरस्कार देऊन सन्मानित करण्यात येणार – ॲड. राजेंद्रप्रसाद धायगुडे*

*तात्या–आभई आदर्श प्रतिष्ठानतर्फे उद्या शनिवारी सहा मान्यवरांचा गौरव*
—————————————–
*वेगवेगळ्या क्षेत्रातील मान्यवरांना पुरस्कार देऊन सन्मानित करण्यात येणार – ॲड. राजेंद्रप्रसाद धायगुडे*

—————————————–
*अंबाजोगाई/ प्रतिनिधी*
“काही माणसे पुरस्काराने मोठी होत नाहीत; तर त्यांच्या कार्यामुळे पुरस्काराचीच प्रतिष्ठा वाढते. समाजासाठी प्रामाणिकपणे, निस्वार्थ भावनेने आणि सातत्याने योगदान देणाऱ्या व्यक्तींच्या कार्याचा गौरव होणे ही समाजाची जबाबदारी आहे,” या भावनेतून तात्या–आभई आदर्श प्रतिष्ठान, अंबाजोगाई यांच्या वतीने कै. ॲड. अण्णासाहेब लोमटे (नवाब) यांच्या स्मृतीप्रित्यर्थ तात्या–आभई आदर्श गौरव पुरस्कार–२०२६ प्रदान करण्यात येणार आहेत. विविध क्षेत्रांत उल्लेखनीय कार्य करणाऱ्या सहा मान्यवरांची या पुरस्कारांसाठी निवड करण्यात आली असून, त्यांचा उद्या शनिवारी आयोजित करण्यात आलेल्या विशेष सोहळ्यात गौरव करण्यात येणार असल्याची माहिती प्रतिष्ठानचे ॲड. राजेंद्रप्रसाद धायगुडे यांनी दिली.

विधी, आरोग्य, शिक्षण, पत्रकारिता, समाजसेवा आणि संघर्षमय जीवनप्रवास अशा विविध क्षेत्रांत आपल्या कार्याचा ठसा उमटविणाऱ्या व्यक्तींची पुरस्कारासाठी निवड करण्यात आली आहे. पुरस्काराच्या माध्यमातून केवळ व्यक्तींचा सन्मान न करता त्यांच्या कार्यामागील सामाजिक बांधिलकी, संघर्ष, प्रामाणिकपणा आणि समाजहिताची भावना अधोरेखित करण्याचा प्रतिष्ठानचा प्रयत्न असल्याचे सांगण्यात आले.

विधी सेवा गौरव पुरस्कारासाठी ज्येष्ठ विधिज्ञ ॲड. सुरेश राजारामपंत सोनवळकर, अंबाजोगाई यांची निवड करण्यात आली आहे. सन १९८६ पासून ते वकिली क्षेत्रात कार्यरत असून, न्याय, प्रामाणिकपणा, कायद्याचे भान आणि सामाजिक बांधिलकी या मूल्यांना त्यांनी आपल्या कार्यातून सातत्याने महत्त्व दिले आहे. विधी क्षेत्रातील प्रदीर्घ अनुभव आणि समाजाप्रती असलेल्या त्यांच्या योगदानाची दखल घेत त्यांना हा पुरस्कार प्रदान करण्यात येणार आहे.

आरोग्य सेवा गौरव पुरस्कार बालहृदय उपचार क्षेत्रातील उल्लेखनीय योगदानाबद्दल डॉ. पंकज भास्करराव सुगावकर (जोशी), पुणे यांना प्रदान करण्यात येणार आहे. वैद्यकीय क्षेत्रातील आपल्या ज्ञानाचा आणि कौशल्याचा उपयोग अनेक बालकांच्या उपचारासाठी करताना त्यांच्या कुटुंबांना मानसिक आधार आणि आशेचा किरण देण्याचे कार्य त्यांनी केले आहे. बालहृदय उपचार क्षेत्रातील त्यांच्या योगदानाची दखल घेत प्रतिष्ठानच्या वतीने त्यांचा गौरव करण्यात येणार आहे.

शिक्षण सेवा गौरव पुरस्कार प्रा. डॉ. मुरलीधर अत्युतराव लहाडे, बनसारोळा यांना प्रदान करण्यात येणार आहे. सामान्य परिस्थितीतून पुढे येत ज्ञानदानाला समाजसेवेचे व्रत मानणाऱ्या प्रा. डॉ. लहाडे यांनी गरीब व गरजू विद्यार्थ्यांना शिक्षणासाठी प्रेरणा देण्याचे आणि त्यांच्या शैक्षणिक वाटचालीला दिशा देण्याचे कार्य केले आहे. शिक्षण हे केवळ नोकरीचे साधन नसून समाज परिवर्तनाचे प्रभावी माध्यम आहे, या विचारातून त्यांनी केलेल्या कार्याचा गौरव या पुरस्काराच्या माध्यमातून करण्यात येणार आहे.

पत्रकारिता सेवा गौरव पुरस्कार पत्रकार परमेश्वर भगवानराव गिते, अंबाजोगाई यांना प्रदान करण्यात येणार आहे. अंबाजोगाईच्या सामाजिक, सांस्कृतिक आणि सार्वजनिक जीवनातील विविध घडामोडींना आपल्या लेखणीतून व्यापक व्यासपीठ मिळवून देण्याचे कार्य त्यांनी केले आहे. प्रतिकूल परिस्थितीत पत्रकारिता क्षेत्रात सातत्याने कार्यरत राहून सामाजिक प्रश्न, नागरिकांच्या समस्या, विकासाचे विषय आणि सार्वजनिक जीवनातील घडामोडींना वृत्तपत्राच्या माध्यमातून स्थान देण्याच्या त्यांच्या कार्याची दखल घेण्यात आली आहे.

समाजसेवा व प्रशासकीय कार्यातील उल्लेखनीय योगदानाबद्दल गजानन तात्यासाहेब चौगुले यांचा विशेष गौरव करण्यात येणार आहे. प्रदीर्घ शासकीय सेवेसोबतच युवकांना शिक्षण आणि रोजगाराच्या संधी उपलब्ध करून देण्यासाठी त्यांनी प्रयत्न केले. अनेक कुटुंबांना स्वावलंबी होण्यासाठी मदत करत सामाजिक बांधिलकी जपण्याचे कार्य त्यांनी केले आहे. प्रशासनातील अनुभवाचा उपयोग समाजहितासाठी करण्याच्या त्यांच्या योगदानाचा या निमित्ताने सन्मान करण्यात येणार आहे.

तर विशेष सन्मान बबनराव लक्ष्मणराव बंडगर, अंबाजोगाई यांना प्रदान करण्यात येणार आहे. अत्यंत प्रतिकूल परिस्थितीशी संघर्ष करत स्वतःचे विश्व उभे करणाऱ्या बंडगर यांचा जीवनप्रवास प्रेरणादायी आहे. संघर्ष, जिद्द, मेहनत आणि सामाजिक जाणीव यांच्या बळावर त्यांनी सामाजिक व सार्वजनिक जीवनात आपले योगदान दिले. प्रतिकूल परिस्थितीवर मात करून उभे राहण्याची प्रेरणा त्यांच्या जीवनप्रवासातून मिळते, त्यामुळे त्यांचा विशेष सन्मान करण्यात येणार आहे.

तात्या–आभई आदर्श प्रतिष्ठानच्या वतीने देण्यात येणाऱ्या या पुरस्कारांचे आणखी एक वैशिष्ट्य म्हणजे विविध क्षेत्रांतील कर्तृत्ववान व्यक्तींची एकाच व्यासपीठावर होणारी उपस्थिती. समाजाच्या वेगवेगळ्या क्षेत्रांत कार्य करणाऱ्या व्यक्तींना प्रोत्साहन मिळावे, त्यांच्या कार्याची समाजाला ओळख व्हावी आणि नव्या पिढीसमोर त्यांच्या कार्याचा आदर्श निर्माण व्हावा, हा पुरस्कारामागील प्रमुख उद्देश असल्याचे प्रतिष्ठानच्या वतीने सांगण्यात आले.

कै. ॲड. अण्णासाहेब लोमटे (नवाब) यांच्या स्मृतीला अभिवादन करत त्यांच्या सामाजिक विचारांची आणि कार्याची प्रेरणा पुढे नेण्याच्या उद्देशाने या पुरस्कार सोहळ्याचे आयोजन करण्यात आले आहे. पुरस्कार स्वीकारणाऱ्या सहाही मान्यवरांच्या कार्याचा गौरव करताना समाजातील कर्तृत्ववान व्यक्तींना प्रोत्साहन देण्याची परंपरा अधिक दृढ होईल, अशी अपेक्षाही व्यक्त करण्यात आली.

तात्या–आभई आदर्श गौरव पुरस्कार–२०२६ वितरण सोहळा उद्या रविवारी, दि. १० ऑक्टोबर २०२६ रोजी स्व. विलासराव देशमुख न.प. सभागृह, अंबाजोगाई येथे आयोजित करण्यात आला आहे. या सोहळ्यास नागरिक, सामाजिक, शैक्षणिक, वैद्यकीय, विधी, पत्रकारिता आणि विविध क्षेत्रांतील मान्यवरांनी मोठ्या संख्येने उपस्थित राहावे, असे आवाहन तात्या–आभई आदर्श प्रतिष्ठानच्या वतीने करण्यात आले आहे.

दत्तात्रय आंबेकर ९४२२९३१४२१